Visibilizar à Infáncia, empoderá-la, incorporá-la ao discurso político…, as mulheres, como colectivo humano e sujeito político levam-no fazendo ao longo destes dous últimos séculos, mas as crianças seguem invisibilizadas e sem protagonismo activo ante as decisons que lhes afectam. A Infáncia tem relegados muitos dos seus direitos a ser única e exclusivamente garantidos no ámbito familiar, onde se sucedem os coidados e os afectos, mas também às vezes, ameças e agressons. Os poderes económicos e políticos nom tenhem entre as suas prioridades assegurar os direitos da Infáncia, porque as prioridades som outras, e todo semelha virar ao redor do cumprimento do deficit e o pago da dívida ao poder financeiro. Assistimos assim a desafiuzamentos de famílias com menores a cargo; famílias que dependem de bancos de alimentos; movimentos migratórios e de refugiados, onde as crianças vivem situaçons de completa indefensom, fala-se de miles de mortas e desaparecidas…
As instituiçons europeias levam tecendo umha nova ameaça desde 1990. George Bush e Giulio Andreotti, colocarom daquela a primeira pedra para construir um novo marco de relaçons económicas entre EEUU e a Uniom Europeia. Para entender que modelo estamos a importar, cumpre lembrar que Estados Unidos é a dia de hoje o único pais do mundo que nom tem ratificado a Convençom dos Direitos das Crianças da ONU. Isso possibilita entre outras cousas, que em Estados Unidos seja legal a cadeia perpetua sem liberdade condicional para menores, algo expressamente proibido pola Convençom. Lembrar também que em importantes indicadores sociais, as crianças estadounidenses levam desvantagem a respeito das doutros países industrializados. Estados Unidos ocupa dentro deste grupo, os últimos lugares a respeito da pobreza infantil, partos de nais adolescentes, crianças de baixo peso ao nascer, mortalidade infantil elevada, crianças vítimas de violência armada e maior número de menores no cárcere.
EEUU, potência hegemónica mundial, coa que a Uniom Europeia pretende assinar um marco legal onde redefinir as novas relaçons económicas, e que nom vam poder ser modificadas por maiorias políticas que se formem posteriormente à assinatura dos tratados, mantém a um de cada seis menores vivendo em situaçom de pobreza, e leis que permitem que as armas matem a umha criança cada três horas, ou condenar a menores e às suas famílias a viver sem um seguro básico de saúde. Sem esquecer que a política exterior norteamericana, e a dos seus aliados europeios, condenam a milhons de crianças a viver baixo o terror das guerras, estendidas ao longo do planeta, para espoliar os recursos que permitem manter o desenvolvimento exponencial do primeiro mundo.
A parte mais consciente da cidadania europeia, mobilizava-se este sábado 15 de outubro contra os tratados do TTIP, TISA e CETA. Nessas mobilizaçons, denunciava-se a opacidade da negociaçom, os ataques aos direitos das trabalhadoras e trabalhadores, o retrocesso em normativas de proteçom ambiental e alimentária, a privatizaçom dos serviços públicos…, concluindo que se trata de impôr contra a soberania dos estados e dos povos, as normas de jogo com cartas marcadas para que sempre ganhem as multinacionais e assegurar os seus interesses. Incorporar à denúncia destes tratados a vulneraçom que representam dos direitos das crianças, permite ampliar a informaçom sobre os efeitos perversos destas políticas. Uns tratados que, se nom o remediamos, iram consolidando a indefensom da Infáncia na Europa.
Mobilización convocada en Ferrol polas Marchas da Dignidade, o pasado sábado
Lupe Ces